ايها الثوار دى الحقيقة متزعلوش

متزعلوش

متزعلوش منى بس دى الحقيقه.

أعزرونى ايها الثوار بس المثل بيقول يا بخت من بكانى وبكى الناس على  ولا ضحكنى وضحك الناس على .

علشان كده لازم نعرف احنا عملنا ايه بالضبط وازاى ؟؟؟؟

إحنا نزلنا ثورتنا ومات مننا ناس كتير جدا واتخطف كتير واتسجن اكتر واكتر وطبعاً غير الاعداد الوهمية المعلنه .

واعتصمنا فى الميدان 18 يوم والعالم كله اتكلم عنهم .. طب أيه اللى حصل ؟؟؟؟؟

الجيش نزل وأجبر مبارك على التنحى وطبعاً مش علشان خاطر عيونا . كان علشان رافض فكرة التوريث وساعتها دور على أكبر قوة منظمة فى الشارع لاقاه الاخوان واتفق معاه على خطة طويلة المدى وطبعاً الجيش اتفق من ناحية تانية وبرضه فى السر مع بعض رجال النظام السابق .

يعنى من الآخر كله بيلعب على كله .

المهم ساعتها كنا احنا أداه لتنفيذ المخطط صحيح احنا زودناها عليهم وضغطنا كتير وبوظنا شوية مخططات لدرجة انهم اجبروا يقبضوا على مبارك ويحبسوه . بس كانوا بسرعه يعملوا تغيير سريع للمخطط حسب وجودنا احنا فى الشارع .

وكل ما ننزل يبهدلونا ويقتلوا ويحبسوا ويصيبوا ويخطفوا بس برضه ماشيين فى المخطط زى ما هو وطبعا الكلام ده اتأكد لما حطونا فى الاختيار الصعب .

مرسي ولا شفيق .

تخطيط سياسي مُحكم . وبعيد تماماً عن إرادة الثوار .

حتى اننا ساعدناهم فى وقفة العباسية وطبعا كالعادة نزل الجيش وعمل عمايله بموقعه زى محاربة الصهاينه .

وبرضه الخطة شغالة وصحينا م النوم لاقينا مرسي رئيس .

ولانهم قلبوا على بعض واحنا كنا معكرين عليهم صفو حياتهم طيروا فيها طنطاوى وعنان .

واحنا برضه بننزل عايزين مطالب ثورتنا قال وايه بنعلن على نزولنا قبلها يقوموا هما مستعدين ويعملوا حسابهم .

وبرضه بنموت ونتحبس ونتخطف .

ودلوقتى المخطط قلب بقى مخطط إخوانى لزياده عدد الدول اللى بيحكمها الاخوان .

طيب علشان نرجع للمخطط الاول اللى الجيش كان حاطة عايزنا ننادى عليه علشان يخلصنا من الاخوان ويكون تانى يقول انا نازل احمى الشرعية . ومايعملناش اى حساب برضه . ولا المره دى يكون اتعلم وهينزل يحمينا ما يحكمناش (( صفحة الجيش يحمى مايحكمناش https://www.facebook.com/geshna))

إحنا آه عندنا هدف ثابت وتقريباً كتير منا ثابت على مبدأه من البداية بس معندناش خطة لتحقيق الهدف ده علشان كده من غير ما نحس بنحقق مخططاتهم هما .

هو ممكن احنا اللى نعمل خطة علشان نقدر نقف قصادهم ولا هنكون عبارة عن نقطة ضغط لغاية ما الجيش ينزل ويحمى الشرعية ولو فكر فى الحُكم هنرجع تانى ننزل ضده ونكمل كالعاده .

يبقى نلخص اللى فات .

·       خطة مُحكمة تحت تنظيم واحد مجمع لكل ثوار مصر وينفذ بكل دقة وعلشان ده يتم يبقى لازم نبطل كتر القاده وان كل واحد حاسس انه هو الوحيد اللى بيفهم والباقى لا .

·       يا إما نكمل ضغطنا وندعم العصيان المدنى وننزل كالعادة لغاية ما الجيش ينزل ولو فكر فى الحُكم نقول نقطة ومن أول السطر .

الله * الثورة * النصر

فجر

https://www.facebook.com/fagr.new